Market Insight：汽車股輪流落鑊

查實不單港股，隔晚美國公布五月耐用品訂單數字遠差預期，第一季GDP增長亦創下三十八年來最大幅度的修訂，向下修訂至負2.9%。即使第一季只係滯後數據，第三季都「嚟緊頭」，但以為股匯市點都會因為意外地差的數據郁吓，殊不知美股照樣靜局，恐慌指數VIX跌返4.4%，收11.59，繼續在N年低位徘徊，金融市場欠缺一個令市況波動性增強的催化劑。

唔玩新股利多於弊

昨日登場的三隻新股，長港敦信（02229）較招股價低22.1%，暢捷通（01588）低8.1%，都市麗人（02298）亦要低1.38%。

古勝冇點你2014/06/27

萬里長空

佢哋共通點唔單止首日潛水，最大鑊係全部即市高位掂都掂唔到招股價，就算抽獎客肯蝕些少使費，原價掛沽投降都無逃生機會，打後兩個半星期，十七隻新股排住隊上市，「豬肉」在前，今次真係考各保薦行功力，都係嗰句，好嘢你抽唔到，無人要你中晒往往損手收場，唔抽新股，長遠利多於弊。

車股繼續有追捧，除華晨系同寶馬傾延長合資年期外，吉利汽車（00175）同東風集團（00489）走勢唔錯，後者昨升3.9%報14.1元，是超過兩年最高位，比亞迪（01211）則升2.6%報45.9元。

昨日有新聞話中央汽車產業政策研究中心，建議向非汽車製造企業，發出兩至三張純電動汽車生產牌照，延續中央同環境污染開戰精神。所謂多個香爐多隻鬼，會唔會對比亞迪帶好大威脅？睇落機會唔大。現時環球汽車市場，能夠無車廠背景以純電車殺出一條血路的，數來數去得美國特斯拉（Tesla）一間。

始終發展電動車依然受限於當地充電裝置普及性、車價是否被當地消費者接受等客觀因素，君可見汽車強國如日本及歐洲眾車廠，仲停留喺試驗性咁推純電動車。

電動車全球未普及

好似歐洲唔少消費者認為，柴油車要比電動或者混燃車環保，雖然電動車零排放，可是充電池生產過程產生染污唔細，故柴油車在歐洲發展，一直領先電動車幾十個車位。

如果中國確認多發電動車牌照，橫睇掂睇，得一間汽車零售的萬向集團，今年佢喺美國收購咗間純電動跑車生產公司Fisker Automotive，有條件大展拳腳。但講到尾，電動車發展故事動聽，為比亞迪帶來相當溢價，但現實內燃機引擎車，以及手機配件才是公司最大收入來源，唔想阻人發達，對新經濟充滿幻想，揀比亞迪無妨，不過心目中車股始終是華晨（01114）及東風比較正路。

餐飲股業績繼續曝光，大快活（00052）截至三月底止全年賺1.08億元，按年跌22.8%，每股賺85.71仙，派末期息39仙。業績倒退主要係物業減值損失影響，撇除後實際經營中業務增長3.9%。

較失望是對手大家樂（00341）在毛利率有輕微改善之下，去年度大快活毛利率輕微收窄0.1個百分點至13.6%。經過昨日一跌，股價返到四月中水平，18.5倍PE及3.9厘股息，同去年經營較佳的大家樂25倍及2.6厘比，已經唔貴。

走高價茶記路線的翠華（01314）去年賺1.56億元，增長20.4%，每股盈利11.23仙，末期息5仙，業績低過大行平均預測的1.92億元。

三快餐股實識點揀

論增長，三股仍以翠華最高，唔及預期的主因，係快速開店的同時初期勞工及物業租金開支也蠶食了利潤，期內翠華收入升35.9%，比純利20.4%升幅高，主要是純利率由約12.1%下降至約10.6%所致。去年度翠華在香港及內地共增設9家分店，總數升至41間，公司預計未來三年，可再翻倍去到超過80間。

去年翠華的員工及租金成本升幅，分別為37.8%及37.2%，高於營業額增長，未來三年平均每年開舖13間（39除3），預期商舖租金見頂，更進取的開新店其實好處多於壞處。

翠華年初至今股價累跌27%，往績市盈率35倍，表面上最貴，但由於分店基數少，加上租金佔收入比例見頂，大行估一五年賺2.45億元，再打個九折，賺2.2億元，市盈率落番25.3倍，以目前快餐股被視為高防守性，平均估值在上升之中去衡量，翠華差不多去到可以入貨範圍。

古勝