孖妹Ｓ檔案：魚缸炒足半年 埋單賺定蝕？

新股攤薄 衍品市閉翳

何：信誠證券副總裁 何智威

彩兒：你做咗經紀廿幾年，儲咁多客，應該都印印腳唔使憂啦！

何：近月港交所（00388）喺篩選新股上市時重量不重質，多批新股接連登場分薄市場上嘅資金，而且唔少小投資者喺衍生工具市場慘蝕離場，我上半年佣金收入比○七、○八年高峰期大跌八成！

雖然我旗下客戶有近300人，但係得5%係活躍嘅短線投資客，佢哋嘅佣金已佔我整體九成，佢哋有自己見解，睇資金流做嘢，主要吼強勢股同細價股，會識見好就收，見勢唔對路肯止蝕，即使賺幾格都已經滿足，呢類客一日可以走好幾隻股份，每日平均有2至3%利潤作複式滾存。

Kitty：今年板塊輪流炒，要投資獲利最緊要轉身夠快，你啲客夠唔夠醒o架？

何：呢批活躍客戶首季主打投資手遊相關股份及由阿里巴巴集團及騰訊（00700）帶起嘅關連股份，好似中信21世紀（00241）同華南城（01668）咁。近期就興炒剛復牌嘅股份，重點策略係眼明手快，到目標價「即閃」，長則持貨一日，短則半日散貨，轉數好快o架！

經紀紛紛另覓好路數

彩兒：B、C組證券行嘅佣金割喉戰未停過，似乎你愈來愈多行家捱唔住喎。

何：佣金收費咁多年來只有降、未見加，仲難捱過○三年沙士嗰陣，依家行內經紀佣金收入大部分更只有四位數字，有行家頂唔住轉行揸的士，而有九仔牌（資產管理牌照）嘅就多數同行家一齊搞基金幫客炒。上半年都冇乜開心事，最令我欣慰嘅就係證監會免牌費兩年，可以減輕負擔。

Kitty：下半年金融市場仲有咩危機？

何：中港政府政策去向，同埋各國地緣政治緊張，係未來半年的隱憂，金融市場往往都牽一髮動全身。而內地打貪活動持續，各界人心惶惶，佢哋有錢都唔敢使，相信濠賭、非必需消費品股等，有排都冇運行。

新舊經濟股輪流旺場

李：敦沛證券副總裁 李偉傑

Kitty： 你經常協助客戶落盤，會唔會同客傾電話仲多過屋企人先？上半年好唔好搵啊？

李：都會o架！依家我旗下活躍客戶大約30位，如果計埋長線投資客，客量都過百。受惠二月大市反彈浪，首季生意認真唔錯，加上新經濟股熱炒，每月佣金收入平均都有十幾萬，比舊年平均幾萬蚊和味唔少！不過，同○七、○八年高峰期每月佣金閒閒哋五十萬比，仲差好遠。

第二季新經濟股失勢，四月份最陰功，客戶坐艇等翻身，雖然兩桶油，即係中石油（00857）、中石化（00386）等舊經濟股翻生，但投機性小，吸引唔到散戶，我無理由推介工行（01398）o架？嗰陣生意真係謝晒，一個月佣金得番幾萬蚊，所以話Hit咩板塊都會影響收入。

彩兒：舊年底新股市場熱爆，孖妹靠新股賺多咗幾條靚裙。近排咁多新股，孖妹開始心動啦！

李：今時唔同往日啦，舊年底登場嘅新股業務獨特性強，其中福壽園（01448）係表表者，中國信達（01359）仲將熱潮推到巔峰，新股又接續登場，資金嚟得切回籠，推動到市場氣氛之餘，勝算又較高，所以都有建議客戶用孖展抽。但近期大部分新股嘅業務獨特性銳減，吸引力自然低，而且招股時間極度集中，佣金收入相比下自然差天共地啦。

滬港通勢吸中資大客

Kitty：你講到咁灰，唔通我想炒股賺番啲錢去南韓Shopping都唔得？

李：我覺得「滬港通」係今年港股最大嘅機遇，計劃對內地投資者吸引力大，勢促中資行來港布陣，行業收購合併潮會持續，預期下半年「網上特平佣金」與「中資大客」會成為證券行業兩大焦點。相信市場七月中前會「回魂」，下半年AH差價收窄概念股、內地品牌股將繼續係投資亮點，新經濟股都有望翻生。

彩兒：敦沛經紀客戶佣金係0.25%，貴過市面上網上落盤咁多，你點樣留住啲客啊？

李：客戶唔介意收費高啲o架，因為有貼身服務，就算客戶投資美股，我就會長開電腦，方便隨時「On Call」，凌晨一、兩點接到客戶電話都好閒。而且我絕對唔會建議客戶投資衍生工具，因為想刀仔鋸大樹，但分分鐘會被揼死，風險太高，啲客好我哋先可以貨如輪轉。

證券行氣氛靜過「沙士」

鄭：凱基證券元朗區分行經理 鄭仲嫺

彩兒：首季大市平均每日成交額接近700億元，但係五月平均每日僅得562億元成交，證券行會唔會鬼影都無隻o架？

鄭：市場淡靜主因大市無方向，有客覺得市況比○三年沙士時期更靜！好彩元朗區證券行主力做街坊生意，即使市況淡靜，仲有近廿位客戶風雨不改落行「番工」，分行員工大多八時半上班，區內人多數早起，舊年成交暢旺嗰陣，客戶會晨早同時落行，九點就落定競價盤，坐足開市時間。不過近排成交弱，有時得四百幾億成交，所以客戶「懶散」啲，多數九點幾先落行，未到中午休市就鬆人，或者去飲完茶接近兩點先返。

散戶講政治多過講股

Kitty：呢排市場無乜特別消息，佢哋八啩啲乜嘢多？

鄭：傾向閒話家常，有時講吓世界盃，有時講吓政治議題。市場近期喪炒殼股及細價股，只有爆出勁升幾成的二、三線股先會掀起佢哋熱烈討論，好似沉寂已久的英發國際（00439）上周四突然發威、爆升近五成，先博到散戶注視股市，但佢哋目前傾向審慎及無心戀戰，唔會瘋狂高追。

彩兒：分行靜啲，你咪唔使咁忙囉！

鄭：依家落行客戶大可一人佔用兩部電腦，或者係因為佢哋首季高追新經濟股，搞到鎖死資金，加上第二季大市波幅收窄，每日波幅僅百幾點，逼住無得短炒。諗起以前旺市爆場，幾位客戶齊齊Share一部電腦嘅情況，都好懷念啊！即使忙到飯都食唔到，都開心過依家得閒去飲茶啦！

彩兒 Kitty

若有料報畀彩兒同Kitty或有嘢問，可電郵money.biz@on.cc