「細價股災」仙股遭狂掟
踏入七月，又勾起部分股友嘅慘痛經歷。○二年七月廿六日，香港發生「仙股」股災（又稱「細價股事件」），事緣喺前一日港交所（00388）發表咗份細價股除牌機制諮詢文件，其中一項建議係將持續30日股價低過5毫嘅公司從主板除牌。股民收風後當然非常恐慌，翌日開市怒掟逾百隻細價股，仙股更成拋售目標。結果當日港股市值就咁蒸發咗逾百億。
當局被斥忽視反應
事發後，有市場人士斥責相關機構推出改革措施前無充分評估市場反應。適逢港府當年同月推行高官問責制，財政司司長梁錦松委任獨立小組對事件進行調查後，港交所行政總裁鄺其志最終要辭職，事關報告認為佢係諮詢文件嘅「始作俑者」，需要對事件負上行政責任。至於當時財經及庫務局局長馬時亨、證監會主席沈聯濤及梁錦松，就統統避過一劫。
股民炒作有咩心得？散戶蘇先生：分段出入控風險
「我平日會較多留意五十大升幅或跌幅港股，選股之時會關注公司業務，尤其看好近期熱炒板塊及受惠國策支持的股份；玩細價股時會從數量着手做風險管理，分段入貨兼分段沽貨；當市況逆轉時就即時止蝕。」
散戶何先生：睇升幅榜揀心水
「每日開市時我會留意港股二十大成交及升幅榜，其次亦會睇股份成交，更重要是找出公司背後股東或持股人士，這樣才更有信心買入。最近的心水之選是建福集團（00464）。」