孖妹Ｓ檔案：價細炒功是怎樣練成的?

孖妹年紀輕輕，喺股壇打滾資歷尚淺。翻查資料，原來下月就係香港「仙股」股災十二周年，加上近期不少細價股炒到癲，不如就藉今次機會，趁快搵高人提點，避免踩細價股嘅地雷，同各位姊妹一齊學吓嘢！

黎：獨立資深股評人黎永良

梁：資深投資者梁帥聰

Kitty：原來香港○二年七月曾經發生「仙股」股災，聽聞當年好多小股東都損失慘重。嘩！近年上市嘅「蚊型股」比當年多咁多，創業板指數上年到依家升咗33%，同期恒指只係升得3%，今年首季創業板股份日均成交額仲大升近4倍，啲股友們炒到咁興奮，但如果再發生類似事件，就……

彩兒：咁又唔需要擔心，啲股友都學精唔少，但細價股始終波幅大，啲股價表現純粹跟消息炒作，其實有咩方法可以降低風險，避免碰釘？

黎永良表示，對創業板上市公司有所保留，因大部分成交少兼無實質業務。

梁帥聰指出，懂得尋找市場亮點，才可以有系統地炒作細價股。

黎：細價股慣常透過配股、供股、發行可換股債券（CB）等途徑獲取資金，股友可循上述思路留意幾點：公司配股係以發行新股定係大股東減持套現方式進行？若屬後者，多數反映大股東對公司財務或業務前景唔睇好。另外，個別公司以大折讓供股只為「抽水」，小股東供股正中下懷，但唔跟供，權益又會被攤薄，所以決定供股與否前，要先了解公司集資用途、供股比例及過往股本變化紀錄。

升市分段沽跌市保本

彩兒：至於發行CB，本身無好壞之分，因為部分公司目的為鋪排易主；但若相關換股價過低，或以零息發行CB，就一定有古怪！

黎：無錯！而我對於創業板上市公司亦有啲保留，因為大部分都成交少，又無實質業務支持，都係少沾手為妙。

彩兒：你對炒細價股散戶有甚麼忠告？

黎：最重要嚴守止蝕，跌穿買入價10至15%就要沽貨保本；喺股價上升時選擇分段減持亦係玩細價股策略之一，當有合理利潤時就要沽出，通常（股價）升多過15至20%就開始減持，或喺上升10%後考慮分段離場。我個人比較保守，只建議股友最多用10至20%資金短線炒股。

危中有機「析」揀為王

雖說玩細價股風險大，但所謂富貴險中求，有啲細價股一日升幾成，甚至幾倍，股友興奮的程度甚至比睇世界盃更加狂熱啦！不如學吓點捉路仲實際！

第一「析」炒收購借殼

Kitty：散戶近期炒某幾隻細價股炒得興起，其中敦沛金融（00812）喺本月初傳獲收購而兩度爆升，九號起一直停牌。喺公司復牌後，散戶仲應該追入嗎？

梁：其實本港細價股收購潮自去年起已開始，由內房股借殼潮，到本地中小型銀行併購潮，再到依家嘅本地證券行，相信收購細價股作業務整合已成趨勢。受惠收購消息傳出的細價股，股價通常一開市時就炒上，相信即日獲利空間微。以敦沛為例，由於西南證券（上海：600369）公布已通過收購敦沛嘅議案，相信市場一定有憧憬，我估計復牌時股價至少高開幾成，散戶追入要小心，因較難估計價格支持位，加上要完成收購都需時，目前又未知道交易作價。建議投資者可轉炒相關業務股份，又或直接轉移視線至近期更熱炒嘅市場焦點，如AH差價股。