絲絲講場：盧韋柏B女從小做義工

舉家參與「全球義工日」

盧韋柏個囡囡雖然只係三歲人仔，但已經準備好做佢人生中嘅第五次義工！嚟緊嘅星期六，囡囡將會同爸爸、媽媽，參加花旗集團第九屆「全球義工日」，去東華三院灣仔院舍同基層小朋友做手工藝品創作同畫畫，今次仲係特登向學校請假出席㗎！

陪基層小朋友整曲奇

俗語有云，施比受更有福，盧韋柏都認為今次活動真係好有意義。囡囡早喺媽咪肚入面嘅時候，就已經有參與「全球義工日」，囡囡前兩年仲同基層小朋友一齊整曲奇餅、做手工，玩得好開心！呢啲咁有意義嘅義工，其實仲好過畀小朋友參加Playgroup喇。

余絲韻