孖妹S檔案：內房散貨 旨在快趣？

吳：星展唯高達研究部主管 吳淑燕

彩兒：內地地產商為求去貨施盡渾身解數出招，有減價亦有搞促銷活動，內房股似乎好唔掂喎！

吳：我近日返內地睇樓盤，見到嘅實際情況未至於咁差，尤其在天津、北京等城市，房價仲企得好穩。雖然投資者擔心內房的存貨問題，但我睇返內地大中城市的數據，平均約有14個月存貨量，情況仍較○八年、一一年理想。事實上，今年首季全國樓市成交出現量價齊降，惟市場毋須過分憂慮，因去年的基調太大，今年成績難免會較遜色，但整體仍較一二年優勝，故目前內房股已被低估，有反彈空間。

睇好中海碧桂園

Kitty：吓，冇怪招咩？我睇內地報紙講到好誇張喎！

吳：現時北京、廣州等地出現「零首期」樓盤，即由地產商向買家貸款繳付首期，旨在刺激交投淡靜的樓市。但其實這是捲土重來的舊招，以往在樓市低迷時期經常使用，可吸引一些有首期付款壓力的年輕買家，但因銀行將承擔較高風險，故最後會由中央銀行出聲禁止。至於跳遠、約會等其他怪招，則未見盛行喎，我諗多數出現在中小型發展商身上，特別係偏遠的樓盤，庫存問題較嚴重，需靠Gimmick吸引市場注意。

彩兒：究竟內房股幾時可翻生？

吳：短期內房股依然波動，一時傳內房股銷情慘淡，一時又傳中央放寬限購令，市場正輪流炒消息。不過，自去年底內房股累積跌幅甚為驚人，目前已過分低估，故此市場一旦有利好消息便趁機炒咗先算。其實我預料內房股在未來六個月有升勢，因睇番一一年中央放鬆調控後，內房股約在兩個半月後便能復甦，但由於今次只放寬限購措施，不像一一年般可大幅提升市場的資金流動性，故保守估計內房股約在四個月後才有明顯升幅。

Kitty：前年內房股威到盡時，你貼中世茂房地產（00813）攞咗香港最佳分析師，咁今年你估邊隻可率先反彈呀？

吳：依家揀內房股至緊要穩陣，畢竟隻隻都跌至低殘，而龍頭股係最值博的，當中中國海外（00688）僅得7.16倍市盈率，大有反彈空間，年內應可回升至24元。

另我亦看好碧桂園（02007），料今年可達到20%的銷售增長目標，加上管理層有新官上任，上月由中國海外前高層吳建斌接替CFO（首席財務官）一職，前景值得憧憬。

彩兒、Kitty

若有料報畀彩兒同Kitty或有嘢問，可電郵money.biz@opg.com.hk