絲絲講場：阿里28神秘合夥人快曝光
阿里巴巴美國上市最為外界關心的，除咗招股規模會唔會破世界紀錄之外，大家最有興趣嘅相信係其獨門自創嘅「合夥人」制度，事關呢個制度就連見慣「同股不同權」嘅美國企業管治專家，都擔心會有風險。尋日就有「有心人」向外電放料，話阿里稍後會喺招股書中，披露集團28位合夥人嘅全部資料，又話阿里上市後董事會人數，將會由4位增至9位添！
美專家憂制度有風險
阿里嘅28位合夥人究竟有邊個，外界目前仍未得知，事關阿里提交嘅初步招股文件，雖然簡介咗呢套制度，但就未有交代合夥人實際上包括邊幾位，外界只係推估創辦人馬雲、副主席蔡崇信、首席執行官陸兆禧同首席營運官張勇應在合夥人之列。
由於合夥人喺阿里董事提名上有超然嘅話語權，所以近期已有美國企業管治專家擔心，呢套制度會將董事嘅提名權，會唔會交予外界無從得知嘅合夥人身上，佢相信提升呢個制度嘅透明度會係化解擔心嘅主要辦法。
孫正義撐阿里唔係「泡」
阿里提交上市文件，就等同進入上市前嘅緘默期，管理層對招股資料都係少講為妙。不過管理層「封口」唔代表公司無「代言人」力撐，例如作為主要股東嘅軟銀創辦人孫正義，日前出席美國研討會時，就大讚阿里嘅盈利勁過亞馬遜同eBay嘅總和，仲叫唔使擔心阿里會係互聯網新泡沫添！
余絲韻