手機應用程式Snapchat嘅賣點係「閱後即焚」，唔好留手尾，其創辦人施皮格爾（Evan Spiegel）喺幾年前嘅電郵，畀人挖番出嚟，內容仲要係啲離經叛道嘅嘢，佢即時道歉都無用，形象已大插水。
Snapchat曾經畀facebook朱克伯格相中，出價30億美元提購，施皮格爾都斷言拒絕，證明佢係非一般科網人，而佢年輕時更加離經叛道，曾經喺一○年發出過侮辱女性言論嘅e貓。
絲絲睇番施皮格爾Evan係史丹福大學讀書時寫嘅e貓，裏面內容幾乎全屬四級「兒童不宜」，例如列出Shopping list裏大麻同如何鎅女，又推許未成年買醉嘅行為，年少叛逆性格盡顯無遺，你估唔到嘅係，佢依家掌舵一家估值數以十億美元科網企業。
絲絲諗番轉頭，如果佢唔係非一般科網人，很難度到「閱後即焚」呢條煞食橋，成功創立人氣分享網站平台Snapchat，難得Evan面對自己嘅年少所為大方承認，不找藉口掩飾。佢話感到非常羞愧及尷尬，仲話自己今非昔比，電郵不代表佢今日對女性嘅看法。
余絲韻