Market Insight：基金經理傾向做淡

近大半個月，港股雖從21,680點彈上接近滬港通後高位23,224點，但唔少二三線基金股浸浸落，反之估值低殘的大價股，滙控（00005）、內銀及本地地產股成了資金避難所，帶住指數向上。基金risk off，主力換貨買入safety margin高的低估值股，後市會有幾好？實在唔使畫公仔畫出腸，古勝唔係十分樂觀，就算今浪升穿23,224點，爆單邊升市威力相信亦都有限。

騰訊（00700）拆細後，首日以原有股份編號及臨時編號（02988）並行買賣，原有「七窿窿」門牌，開始以每手100股形式交易，意味騰訊上車價由四萬餘落番去萬一蚊。可是首日兩個編號加埋2,455萬股成交，僅較前一日多2.9%，顯然未收到拆細的預期效果，既未旺丁、更不旺財，股價跌3%收報109.8元。

古勝冇點你2014/05/30

萬里長空

金軟現價仲係貴

新秀麗（01910）斥資8,500萬美元（約6.63億港元）收購美國手機保護殼品牌Speck Products，藉以進軍手機及平板電腦保護殼市場。美國佔Speck八成銷售，可能唔少看官同在下一樣，昨日至知有這個品牌。收購文件顯示，一三年度Speck銷售額1.048億美元，按年跌17.2%，稅後虧損1,840萬美元，淨資產負值1,100萬美元，睇嚟收購未必可以為新秀麗業績帶來即時好處。

小米影子股金山軟件（03888）的首季業績，營業額6.76億元人仔，按季及按年升1%及47.8%，純利2.46億元人仔，按季及按年則升48%及25.6%，撇除出售合營公司收益，期內業績明升實跌，營運溢利跌29%。期內毛利率按季跌3個百分點至84%，網絡遊戲每日平均最高同步用戶人數59.9萬，按年跌5%，每位付費帳戶每月平均收益48元人仔，按季跌2%。

業績曝光後，金軟股價急挫11.5%至22.95元，市值單日蒸發35億元，惟以大行預測8.5億至10億人仔的全年盈利計，股價一啲都唔算平，其高昂溢價要靠綽頭多多的小米偶然傳會借殼金軟的消息支持，投機味濃唔係好啱在下胃口。

本地樓價難回落

前日大埔白石角科學園毗鄰的一幅住宅地，由稀客鷹君（00041）以每呎樓面地價3,300元中標，成交價遠低過預期外，甚至比七年前同區首幅推出地皮低出三成。古勝認為，咁嘅出價無流標係一奇，據報該地皮四份標書，其中一份包括毗鄰大量待售新盤的信置（00083），居然無出嚟托價又係另一奇。

早排去一個飯局，有發展商高層呻話短期都唔會再投地起樓，理由唔係佢哋睇淡樓價，主要擔心特區政府好大喜功，幾年內一大堆基建齊齊開工，港珠澳大橋、西九文化區，仲有唔知搞唔搞得成的第三條跑道，同愈揭愈臭的高鐵及西鐵為趕進度，最後都好難避免，要靠有錢洗得鬼推磨，用銀彈搶人。

未來兩三年建築成本只會有上無落，就算麵粉價落咗，因為麵包師傅薪水愈來愈高，麵包都好難賣得平。buy唔buy，大家悉隨尊便，但由白石角成交價公布後，昨日主要地產股統統逆市向好，可見投資市場有類近睇法，唔信一幅地成交價會隊冧樓市。

昨日有隻異動股叫人注意，就係匯銀家電（01280），股價一度抽高至0.405元，收報0.335元，升24%，成交達到8,475萬元，以其昨日市值3.5億元計，昨日的成交量着實不少。

彩票銷售唔易做

觸發該股股價飆升，成跌市奇葩，主要是公司的通告指出，內地彩票業務具有樂觀前景，故決定利用於內地已建立的銷售渠道涉足彩票銷售業務，並披露正與彩票發行管理機構洽商代理銷售彩票及其他相關事宜。

內地彩票投注額每年遞增，去年彩票銷量突破了3,000億元人仔大關，平均每人每年買230元人仔彩票，誰能參與銷售當中，自必可以分一杯羹。

但老實講，涉及彩票的設備及銷售涉及多個部門，能涉足的企業均有一定背景，而銷售渠道比匯銀家電更具規模的企業為數甚多，到底匯銀能否如願涉足彩票相關業務，不妨拭目以待。

古勝