女人錢真係咁易賺？近年醫學美容愈嚟愈好搵，連稱霸全球食品界嘅雀巢都想撈埋一份！雀巢啱啱用咗14億美元（約109.2億港元）同加拿大藥廠Valeant買咗5個除皺、抗皺護膚品牌嘅美、加兩地商業授權。
雀巢二月已經喺原本同歐萊雅（L'Oreal）合資嘅美容業務，攞番晒控制權，唔知係咪想繼食品王國之後，整多個美容王國呢？
雀巢今次單刁最吸睛之處，係買到嗰幾個品牌授權當中，包括盛傳連荷里活型男湯告魯斯都打過嘅「童顏針」Sculptra。另外4個品牌Restylane、Perlane、Dysport同埋Emervel，全部都係抗皺品牌。
雀巢幾個月前取得全權控制嘅Galderma，準備改名為「Nestle Skin Health」。
分析員話，吞併Galderma加埋今次出14億美元買品牌授權，對於每年營業額千億美元嘅雀巢嚟講實在濕濕碎，但以食品巨頭姿態踩入美容界就別具意義。
賣品牌授權嘅Valeant正是Bid緊Botox生產商Allergan嘅潛在買家，今次交易估計唔會影響提購進程。啱啱Valeant尋日將作價加碼至每股58.3美元現金加0.83股Valeant，每股現金部分比之前多10美元。
余絲韻