好多讀者覺得做投行好忙，其實ibanker都有好得閒嘅時間，例如高盛尋日出咗一份67頁嘅報告，講吓今年世界盃經濟之餘，又Tip吓邊隊今年拎得國際足球壇最高榮譽嘅雷米金盃。
根據報告，今年決賽會係神級對戰──「巴西對阿根廷」，而前者奪冠概率，喺32隊參賽隊伍當中係48.5%，可謂頂頭大熱，事關次熱嘅阿根廷奪冠概率都只得14.1%。
最多香港球迷鍾意嘅國家隊英格蘭奪冠機會極低，得1.4%，呢個消息嘅震撼程度，絕對係香港球迷嘅A1頭條。
高盛用咗好多Model去計算唔同國家隊奪冠嘅機會率，成堆理論大家都未必識（其實係絲絲自己唔識），總之今年半總決賽係由巴西對德國、西班牙對阿根廷，意大利畀西班牙KO，英格蘭32強就畀哥斯達黎加搞掂咗，法國就過唔到德國嗰關，至於金靴獎得主就係美斯大機會過尼馬。
安達人壽保險總裁藍沛樂講起足球就眉飛色舞，佢話自己以前踢後衞，又話做保險唔可以咁Risky。佢同絲絲講自己係阿仙奴粉絲，佢亦大膽估今年愛隊德國拎冠軍，法國就有機會爆冷，不過今年世界盃喺巴西舉行，決賽有機會請假睇波。
余絲韻