市傳汽車租賃及甜品速遞商Uber嘅估值創天價170億美元，有人話Uber已經貴到起「泡」，但絲絲睇番Uber數據，佢旗下喺三藩市同紐約市兩地嘅兼職司機每年收入介乎7.4萬至9.08萬美元（約57.72萬至70.82萬港元），咪即係月入4.8萬到6萬港元咁滯？同我哋香港司機做到「嘔白泡」都係每月得嗰萬多港元，簡直羨慕死人囉。
不過，咁仲未算厲害，原來紐約市科技界工人嘅平均年薪都只不過係8.78萬美元咋。
據《華盛頓郵報》講，幫Uber做兼職司機每周工作至少40個小時，做足鐘數嘅話，紐約市司機可以年賺9.08萬美元，喺三藩市嘅年賺7.4萬美元，而呢兩地的士司機通常年賺只係3萬美元。原來幫Uber打工咁好搵，唔怪得由今年一月起，每月吸引到2萬新兼職司機加入。
Uber呢個Call車App估值係近年IT界神話，舊年中佢哋融資估值只係35億美元，今年已加入100億美元俱樂部，較內地IT之星小米科技嘅100億美元估值仲高出七成，加上佢哋用兼職司機全外判服務，根本唔怕裁員，呢個商業模式被視為IT未來之路。
余絲韻