自從去年英倫銀行行長卡尼上任後，英鎊由1.48升至今年最高近1.7水平。英國呢兩年推出咁多措施刺激經濟，如FLS低息貸款、「Help to buy」幫你置業上車措施又或者財政預算案不斷減稅派糖，直接令英國股市衝上十四年高位，而樓市去年都升了超過一成，背後目的明顯是為了明年五月大選的選票。
經濟好，選民自然傾向投番畀現屆政府，卡梅倫贏面相信都幾大。咁到了這個關鍵時候，英倫銀行會唔會咁快就加息打擊股市同樓市，到時經濟跌番下來，選票就有不明朗因素，如果係我就唔會博，除非真係去到非加不可的情況。
見到卡尼日前在訪問中發表了上任以來用最嚴厲的言詞評論樓市不斷上升，話依家已關注呢個問題，希望先出口術令市場降溫，相信仍未去到加息這劑重藥。咁加息自然睇通脹，四月份消費物價指數由三月的1.6%升至1.8%。
而扣除食品同能源等核心通脹就是去年九月以來最大增長，即市就曾經令市場又炒英倫銀行加息，令英鎊一度抽升至1.68中位。技術上，1.7呢個價係金融海嘯後高位，再升穿就睇1.74。
除非美匯指數明顯跌穿79，否則因為加息預期令英鎊再向上突破的機會未算好高，再睇番歐元走勢開始逆轉，英國經濟到年尾前都可享有低息蜜月期，不過匯價相信要先行調整，建議1.69可以試沽英鎊，止蝕於1.7，目標睇先穿1.674，下一支持在1.668。
資深外匯市場人士 陳健豪