電影《華爾街狼人》主角嘅真實人物喬丹‧貝爾福特（Jordan Belfort）放監後，依家做勵志講師四出𢱑銀，上一堂閒閒哋盛惠2,000港元，難怪佢話「今年搵錢實多過以前做股票經紀最風光嗰陣」，誓言搵超過1億美元（約7.8億港元），等佢有錢賠償當年畀佢劏到一頸血嘅投資者。
貝爾福特話，打算用6個月時間將佢喺美國45個城市巡迴演講嘅部分收入，即係大約5,000萬美元存入一個託管戶口，直接過畀受害人，期望每位苦主攞番啲錢後，佢個心會好過啲。
點解係5,000萬美元，唔係5億美元？呢個數係其實源於佢間證券行Stratton Oakmont畀美國證交會（SEC）拉閘之後，華府成立咗一個1.1億美元嘅賠償基金，並且要求佢孭起其中一半。賠償雖則話係華府規定，但絲絲相信今時今日嘅狼人嘅贖罪係真心嘅。
「狼人」仲告誡各位唔好將野心同貪婪混為一談，要知道野心係好事，熱情可以令一個人富起來，惟獨貪婪一定係壞事。佢期望自己做到「付出比獲得更多」嘅境界，因為咁樣係可持續嘅成功。
余絲韻