呢個世界真係無奇不有，日前就有間創投公司，竟然委任一個機械人做公司董事，大家無睇錯，真係人工智能機械人嚟㗎，呢個機械人更可能係全球第一個公司董事！公司仲話機械人同其他董事享有「同等權利」，將來甚至會有投票權添。
有外國傳媒報道，英國Aging Analytics公司授權一家創投公司Deep Knowledge，使用命名為「VITAL」嘅機械人，為創投公司提供投資建議。
有中環口痕友就話，機械人做公司董事好橋喎，因為一定唔會貪腐囉！又陰陰嘴笑咁話，如果有機械人做公司董事，阿里巴巴可能就唔使堅持用合夥人方式上市。仲講笑話，機械人理論上會為股東爭取最佳利益，堪稱最佳企業管治模範。話唔定，被視為本港核心價值嘅「同股同權」都可能要靠邊站，受到挑戰呢！
余絲韻