絲絲講場：上市委加薪變「加辛」？
港交所（00388）上市委員會委員，負責為新股上市把關，每年開會無數，每次開會前仲有成呎厚嘅文件要睇，港交所由○七年開始象徵式每年畀番八萬蚊上市委員做「車馬費」。由○七年到依家，「車馬費」一路都冇調整過，所謂通脹都翻幾番喇，絲絲聽聞，港交所考慮加上市委員人工喎！
新股數目多或要加班
有市場人士就話，用「加辛」嚟形容可能更為貼切，事關近年新股數目超多，有時要「加班」，一周開兩次例會審批新股；加上每年又有季度政策會議、紀律會議等，好似阿里巴巴想用合夥人模式在港上市單嘢，都搞到上市委員會一頭煙。
其實上市委員個個都係專業人士，時薪分分鐘以千元計，當然唔旨在一年八萬蚊嘅「車馬費」，「加薪」都係反映港交所重視同體諒佢哋啫。
阿里棄港 「合夥制」照傾
每年五、六月港交所都會公布新一批上市委員會名單，絲絲翻查過，今年只有一名委員夠六年任期，理論上今年上市委員大執位機會唔大。不過，上市委員任命其實按每年計，若果有人自願唔做就唔同講法。
講開阿里巴巴，雖然已落實去美國上市，但本港就唔同股權架構諮詢仍有下文，今個月尾上市委員會將會開季度政策會議，若果通過嘅話，諮詢文件就會出台。
好多人都話，依家諮詢都冇用啦，阿里都放棄咗喺香港上市，但有消息人士就話，大家要將兩件事分開，仲話就算上市委中幾個最反對合夥人制嘅委員，都同意要諮詢喎。咁又係嘅，傾吓冇壞，做唔做係另一回事！
余絲韻