要數新一代城中單身貴族，「樓神」趙國雄個仔趙朗（Ronald）肯定榜上有名。Ronald除咗爸爸家底豐厚之外，仲有個好勁嘅花名，叫做「羅素街狼人」，但查實佢為人一啲都唔「狼」。
講到感情生活，佢仲變咗怕醜仔：「我知好多人都覺得我係筍盤，我亦都有心儀嘅對象，但依家真係冇時間拍拖囉。」「羅素街狼人」呢個外號，源於Ronald拆售銅鑼灣羅素街8號一役，短短兩個月就為佢嘅基金里昂亞太恒富賺咗十幾億。
年方27歲嘅Ronald，話希望趁年青時候喺事業上放手一博，費事老咗嘅時候冇咁好精力，所以生活上都做咗好多妥協。
好似佢衣着方面就要老成持重，連頭髮都要梳個老土「賭神頭」。仲有就係大部分時間都貢獻咗畀份工，佢話每當有「大刁」就快要拍板時，每周工作時間超過100小時。
雖然忙，但原來佢都好注重健康同體態，每星期都會「吱」幾個鐘出嚟做Gym或者踢波。佢咁忙，如果有啲姊妹想「主動出擊」可以點做呢？絲絲畀個貼士你啦，佢平時唔使做買賣，就會上晝開會，下晝外出睇樓盤，大家可以去山頂、南區等超級豪宅嘅樓盤或者地盤巡吓，睇吓撞唔撞到Ronald啦！
余絲韻