Market Insight：汽車股選擇吸納

依家睇落華爾街原來好多人都用緊同一枝盲公竹，阿里巴巴入紙日，周二晚美國科技股大插插，好似facebook跌4.1%，微博跌7.3%、Twitter跌17.5%，佢哋由近幾個月的高位（微博上市仲未夠一個月）比較，累積跌咗19.1%、25.2%及57.2%。

阿里巴巴最快一個月就可以上市，但賓架界預期踏入五月靜市，加埋六月世界盃，七月之後招股可能性比較大，日日倒水一樣的科網股到時乜世界，真係無人知，阿里可唔可以用傳統中的整體1,500億至2,000億美元估值上市，天曉得。

古勝冇點你2014/05/08

萬里長空

騰訊要跌仲有水位

佛誕假返嚟，港股依然無起色，恒指由頭跌到尾，收市跌230點報21,746點，主板成交622億元比假期前多近五成，基金堅隊，過千隻股票錄得跌幅。單係一隻騰訊佔恒指65點跌幅，心裏一寒，兵荒馬亂之際，身邊好多人問騰訊博唔博得過。

要知道股票從來好少在合適價格上落，反而經常在超賣及超買之間游走，646元的騰訊相當於一四年44.8倍PE，以37.8%增長（先唔講同過去三年平均28%左右比較係咪太樂觀），PEG1.18倍超出1倍的公認合理水平，近日的跌勢，估值返到去33倍PE，PEG落返0.87倍，客觀事實係比之前合理，但夠未呢？

搵番網絡股未有咁癲的一二年，騰訊股價在150至263元之間上落，巧合是高位的PEG1.17倍同今浪高位接近，反之，低位只係0.67倍，套用於今日，即係可以去返25.3倍一四年PE，即係362.5元，所以你問騰訊股價跌咗舊幾水買唔買得，真係唔識答你，如果啲錢唔等住用，又有晒心理準備，就算跌多一舊水仲有能力溝貨，閣下即管做清兵，不過依家通街都係平到暈的中資股，要接跌緊落嚟的刀刃，唔使預我。

收租股恐接力捱沽

五一黃金周，個人遊數字與消費一樣失色，零售股跌勢由金飾股蔓延開去，周生生（00116）及周大福（01929）昨跌2.4%及1.2%；服裝股I.T（00999）跌3.3%，包浩斯（00483）跌4.6%、堡獅龍（00592）跌4.6%、利邦（00891）跌4.9%。撞啱出中期業績預警，佐丹奴（00709）急挫16.6%，舊年賺6.63億元往績PE 10倍，街外舊有預測估全年賺8億至9億元，睇怕已無望。

服裝零售過去幾年頂得住貴租，全靠個人遊旅客消費，如果訪港人次見頂，加埋消費因內地經濟轉弱及人民幣匯水掉頭走，佢哋好難頂得住天價舖租，會唔會輪到遊客區大業主好似鷹君（00041）、九倉（00004）被沽，捧場客短期都係避一避。

昨日收市後，滙控（00005）出季績，稅前盈利跌20%，是大行預測15至19%跌幅下限，倫敦早市股價應聲跌超過一個巴仙。基金股中，華晨汽車（01114）是少數逆市奇葩，昨升5.7%收報12.24元，皆因德國寶馬季績中，投資收益勁升1.58倍2.25億歐元，創單季新高，當中大部分來自華晨寶馬項目。

昨日交銀因為咁調高華晨今明年每股盈利4.2%及1.6%，目標價16元，瑞銀認為唔使太興奮，因為涉及寶馬對非華晨合營以外的投資項目的會計變動，睇13元建議中性。姑勿論點，自從反貪及向染污宣戰後，車股靜咗一段時間，稍有好消息反應咁大，多少見到調整可能已經去到尾聲，邊隻有機會，就要睇四至八月傳統淡季，邊間公司會有驚喜？

廣汽業績較具保證

東風集團（00489）一味夠平，一四年6.5倍PE，可惜入股雪鐵龍短期對資產負債表及業績幫助唔大，個零月前提過廣汽（02238），股價上過9元樓上又碌番落嚟，可以諗番佢。

早前季績對辦，毛利率改善自主品牌損失減少，反之幾間與外資合作的合營公司收入大豐收，一來一回，全年交出市場預測五成以上增長並非過分樂觀；中期而言，今個月廣州本田推新一代FIT，年底再有另一款小型SUV Vezel，有助維持銷情，長線有一五年的三款Cherokee Jeep車系，早前車展反應唔錯，未來兩年業績增長較具保證，一四年9.4倍PE，昨插落7.73元收，諗得過。

古勝