由新聞之花到輪后，早前搖身一變成為賣樓女神，兼有一個美滿幸福嘅家庭，趙海珠（Alison）應該係唔少香港女性既模範。不過，最新消息係，珠珠啱啱辭去咗恒地（00012）營業（二）部高級經理嘅職位。
絲絲尋日打電話俾珠珠求證，佢好坦白證實咗呢個離職消息，且離職都係呢兩日嘅事，但對於點解唔做、未來去向等等，就一律「冇嘢想講」。被問及會否重返輪場，佢就話「暫時冇計劃」，但繼續專心湊依家一歲大嘅囝囝就肯定嘅。
其實，珠珠加入恒地都係去年十月嘅事，而家只係過咗半年就「劈炮唔撈」，真係幾突然，始終之前佢喺法巴做輪后，一做都有六年幾，唔通佢賣樓禮拜六、日隨時都要開工有啲唔慣？而絲絲睇過珠珠嘅微博，算係找到少少蛛絲馬迹，怕且佢想多啲時間陪家人？
而四月底，珠珠同老公、囝囝，第一次家庭旅行就去咗新加坡幾日，雖然珠珠講話冇乜特別，但見佢微博上都有幾段分享，今次一家人一齊旅行應該都相當難忘吧。
余絲韻