傳統中國人都鍾意「8」呢個數字，象徵住「發發聲」，「易發發」（288）搶手好易理解，好似萬洲國際咁，之前都用「00288」作為上市股票冧巴，本來集資額逾400億港元嘅萬洲係威係勢，史無前例咁有30家投行護航，以為咁就無有怕，點知都係搞唔掂，就算大幅削減集資額，都上唔到。
之不過，唔知話佢咁啱得咁橋定話佢邪好，舊年都係用「00288」股票號碼上市嘅合和香港房地產，同萬洲都係同一命運、同一結局，就係上唔到市。咁睇嚟呢個冧巴都唔係咁老黎咋喎！唔知之後仲會唔會有公司敢用呢個冧巴？
講開萬洲，如今上唔到市，承銷費梗係凍過水啦，可能仲分分鐘要蝕本添！因為有外國傳媒引述消息指，各大投行包括中銀國際、大摩、中信証券、高盛、渣打、瑞銀，成隊人飛來飛去到歐、美、亞洲做路演，住酒店搭飛機嘅使費都咪話唔揦脷。
雖然單deal告吹，七大聯席保薦人都會有象徵式保薦人費用，但據聞個金額係以「tiny」嚟形容，即係丁屎咁多，一般而言，香港IPO集資10億美元大概係2至3%費用，但萬洲招股書披露是1.5%，低咗一大截。
余絲韻