期指觀瀾：國期好倉繼續持有
期指結算日大市在無特別利好消息下狂挾321點，結算後翌日亦喺無特別利淡消息下打回原形，恒指周三跌319點，收報22,133點。
周三恒指即市低位見過22,097點，雖然十五分鐘圖中，未跌穿周一、二即市低位22,099點及22,096點，但恐怕已足夠玩謝博大市轉勢的期指客。今年這種不明不白的升跌日子好似特別多，滬港通前大市挾足二千點，消息一落實升勢立即玩完，遇上這類市況，唔入市會手痕的散戶，除控制注碼減低心理壓力外，可以做的實在唔多。
周三跌市，恒指91點損失是來自騰訊（00700）一隻股票，收市價483.2元，剛好同一月的調整低位睇齊，如確認破頸線，短期將見450元。
隔晚聯儲局議息，一如市場預期再減100億美元買債規模，但第一季GDP修訂後得0.1%，遠差過市場預期。
聯儲局更積極退市的可能性降低下，十年美債息回落，近日應有資金回流新興市場股市，問題係新興市場中最最最落後的中港股市，大孖沙排到幾時先去炒落後，好難講。但相信大市跌至21,137點的機會唔大，在9,800點開的國期好倉，會繼續以10,000至10,055點為食胡目標。
John Mullen