立法會議員張華峰「牛一」，本港九大證券團體非常有心，將於明日（5月2日）為「肥佬張」搞一個別開生面嘅生日會，仲特登為生日會改咗個名叫做「輕談喜聚華峰夜」，睇嚟九會一共百多人，想同張華峰相聚談心，齊賀佢「牛一」。
自從張華峰做咗金融服務界立法會議員，成日為中小經紀發聲，要求監管機構同政府關注中小經紀行經營愈來愈困難，所以佢同本地經紀關係好密切。
絲絲聽聞，一班行家，一知道張華峰生日，即時起哄話要同佢搞生日會。生日會飲飲食食係指定動作，但生日會「搞手」更加不忘為張議員送上驚喜。
「搞手」之一嘅證券學會會長李細燕話，學會將會以「打油詩」慶祝張華峰生日。佢哋都真係幾有心思，整咗個相架送畀張華峰，除咗集齊多年來張華峰嘅珍貴相片外，仲以「恭賀張華峰立法會議員生日快樂」為題作咗首詩畀張華峰。
張華峰上個禮拜趁立法會休會，飛咗去歐洲一轉充電，除咗「濕平」、「食嘢」外，佢都不忘股壇大事「滬港通」，要求喺立法會財經事務委員會討論「滬港通」，並且想邀請財庫局局長陳家強上去講解一吓。咁又係，中小經紀今鋪有冇得食「大茶飯」就睇「滬港通」！
余絲韻