絲絲講場：價高過永亨上商都唔賣
前排永亨（00302）公布以市帳率1.77倍賣盤，雖然低過市場預期，但買家新加坡當地有唔少聲音認為買貴咗，港銀老字號上海商業銀行董事長榮智權話，華僑銀行肯畀呢個價，證明香港金融業依然有吸引力。
榮智權仲話，上商都不乏中外買家洽談，個價仲好過永亨，又指「三倍嘅話當然吸引」，不過賣盤存技術問題，所以上商都未有考慮賣盤。
永亨：賣盤似送仔留學
另方面，尋日永亨董事長兼行政總裁馮鈺斌出席股東會，講起賣個親生仔畀華僑銀行，佢話自己年紀大，而大股東馮氏家族同紐約梅隆銀行都同意出售，就好似送個仔出國讀書，幾唔捨得都要咁做，「都係為佢好！」今次亦可能係佢最後一次出席股東會。佢話，同嗰邊行政總裁錢乃驥幾老友，洽售過程都順暢，小股東亦唔覺得賣盤好可惜，大家表現好高興。
港銀買少見少，同大行競爭挑戰更大有關。榮董三代都掌管住上商重要職位，現年91歲嘅爸爸榮鴻慶係銀行董事兼喺上海商業儲蓄銀行出任董事長，仔仔榮康信就擔任上海商業儲蓄銀行董事兼副總經理。
榮董話下年係上商建行一百周年，期間經歷過唔少困難，雖然唔少港銀已獲併購，但都盼望上商有機會做大。
余絲韻