絲絲講場：搵人踩巴郡股神嘆好難

股神巴菲特又再表演真金不怕洪爐火嘅技能！佢嘅旗艦公司巴郡，下個月開股東周年大會，同往年一樣，打算搵位唱衰自己公司嘅基金經理參加。

但佢好大口氣咁話搵個「熊仔」好難，即係曲線唱好自己，個個基金都睇好巴郡囉。

股神有咁嘅諗法都唔係第一次喇，上年嘅周年大會，佢就請咗知名對沖基金經理Doug Kass。人哋都已經講到明睇淡公司嘅前景，巴菲特都仲請佢去，咁鬼藝高人膽大，唔係個個得o架！

唔單止咁，佢好多時接受訪問時，都好有料到，好似早前接受CNBC訪問時就講到，喺可口可樂派股份畀持股人做補償嘅方案投咗棄權票。當大家都揣測佢想賣咗可口可樂啲股份嘅時候，作為最大股東嘅巴菲特又大派定心丸，話自己好愛可口可樂，好尊敬班管理層，從來都冇諗過賣股份，仲話鍾意可口可樂到冇可能會投反對票。

一陣又投棄權票，一陣又賣口乖，絲絲真係睇唔透股神諗緊咩。

余絲韻

絲絲講場：搵人踩巴郡 股神嘆好難