絲絲講場:雅虎創辦人回巢爭入局

雅虎將會在六月底舉行周年會議,選出新的董事會成員,而絲絲竟然喺雅虎公布的候選人名單裏面,發現雅虎創辦人之一菲洛(David Filo)個名﹗菲洛今次闊別雅虎18年後再爭取重入董事局,如果成功唔知公司會唔會再有一番新景象?

菲洛競爭對手够猛料

一九九四年菲洛同楊致遠一齊創辦雅虎,唔講唔知,原來一開始個搜尋器叫「David and Jerry's Guide to the Web」,到後來愈做愈大先改名做「Yahoo!」。不過菲洛九六年就放棄咗董事局個位,直至今年,以47歲之齡,重新提名入局。雖然雅虎係佢嘅「親生仔」,但都唔代表佢一定會當選,事關另外兩位競爭對手嘅來頭一啲都唔細!

絲絲睇過一位係美國低佣金經紀公司嘉信理財嘅創辦人Charles Schwab,另一位就係美國超市龍頭沃爾瑪嘅前行政總裁H. Lee Scott Jr.,依家雅虎行政總裁邁耶同樣係沃爾瑪嘅董事局成員,分分鐘有得加分都唔定!

之不過,即使入唔番董事局,菲洛都仍然係雅虎嘅大股東嚟嘅!

余絲韻