絲絲講場：魏橋張士平把根留住
為咗減低人工開支，好多內地企業都會選擇搬廠去東南亞，因為人工比內地低好多，但全球最大棉紡織企業魏橋紡織（02698）嘅母企山東魏橋創業集團並冇隨波逐流，30年嚟一直堅持「中國製造」。
話說魏橋喺30年前只係一間寂寂無聞、得60幾位員工嘅小型油棉廠，到依家就成為《財富》雜誌世界500強裏面5間中國民營企業其中之一。規模可以發展得咁快，除咗產品質量高，仲有賴董事長張士平嘅一份社會責任感。
魏橋有近16萬工人，幾乎全部係農民工，公司仲喺過去短短四年加咗佢哋人工15次，就連最基層嘅紡織工人都賺四萬二千蚊人民幣一年。
絲絲幫佢哋計過條數，單單計人工，魏橋一年咪要成67億元人民幣，認真重皮。
憂員工生計 未擬遷廠
喺中國設廠嘅成本高，近年愈嚟愈多製造業搬到越南、柬埔寨等地開廠。絲絲知道有唔少東南亞外商都邀請張總到當地發展，但佢一直都不為所動。原來因為驚會搞到農民工失業，佢堅拒將山東廠房搬離所處嗰片魯北平原。
張總坐擁290億人民幣嘅資產但就心繫員工，連搬唔搬廠都考慮到員工嘅生計，絲絲都覺得好感動呀。
盛讚中國工人最勤力
之不過，張總透露，佢原來仲有另一個原因唔肯搬廠，就係佢相信中國嘅工人係世界上最勤力嘅，即使繼續留喺內地，只要公司做到技術創新、提升產品質素，長遠嚟講就可以消化到高人工所帶嚟嘅高成本。
況且，張總曾到訪意大利、日本同埋美國等紡織同行，佢哋嘅人工仲貴過中國工人，但好似美國政府咁，仲不斷鼓勵本土設廠，都係一個理由，就係只要產品有高技術，足可抵銷高人工成本。
有咁長遠嘅眼光，張總貴為山東首富，確係實至名歸。
余絲韻