絲絲講場：ACCA帶CFO公然落Club
絲絲尋日同ACCA（特許公認會計師公會）香港分會會長曾志偉（Roy）食晏仔，點知佢飯都未食完，就拿拿臨叫走，話要趕住落Club，絲絲嚇咗一跳，唔使咁早兼咁揚呀？
Roy笑絲絲心邪，查實佢係去ACCA啱啱成立嘅CFO Club。Roy講明呢個Club好正經，係一個分享平台，畀會員就財務專業嘅事宜交換心得及意見。
財務總監交流心得
CFO Club開幕禮好熱鬧，絲絲見到新鴻基地產（00016）執行董事兼首席財務總監陳國威、金地（集團）高級副總裁韋傳軍、平安財智投資管理CEO、首席投資官王紅波、平安大華基金管理財務負責人、資本市場專戶投資部總監王彥、以及智慧中國集團前首席財務官彭波等人。
佢哋趁開幕禮，整咗場論壇。有人話財務總監最有機會繼承一家企業作為首席執行官嘅人選，陳國威話，首席執行官肩負起將公司提升到另一台階嘅責任。財務總監可唔可以成為首席執行官，主要睇個人能力，同職能冇太大嘅關係。財務總監掌握大量數據，點樣將呢啲數據轉化為有價值嘅資訊，從而對企業作出貢獻，先至最重要。
余絲韻