早前港交所（00388）行政總裁李小加有關同股同權嘅網誌，引用港交所本身做例子，話同股同權都有例外時，搞到政府有啲意見。估唔到，今次風水輪流轉，輪到小加總裁畀人激親。
話說ACGA（亞洲公司治理協會）日前發表咗一個關於同股同權嘅調查報告，其中一條問題叫被訪者就港交所、證監會同政府喺處理阿里巴巴來港上市一事上評分。結果港交所喺三個機構中表現最差，有28%人話港交所喺事件上表現差。
李小加尋日被問到有關調查時，都有少少動氣，話點解唔加埋紐約證券交易所、美國證交會等叫人評分，話咁樣先夠客觀全面。有口痕友就話，今次個調查，好明顯係衝着港交所而嚟，一來ACGA過往冇做開呢啲調查，二來問題頗有針對性喎！
阿里巴巴單嘢，真係好多人熱議，尋日連港交所小股東都好關心，喺股東會上問阿里單嘢，港交所主席周松崗就話本港有《上市規則》，公司必須符合規則先可以上市。如有特別要求，港交所都無能為力。
同時，港交所若果要改變上市規則，必須要經過長時間諮詢，同埋要有市場共識先可以做。小加總裁就承認，事件已過咗一段時間，但依家有關唔同股權架構嘅諮詢仍未有進展。
余絲韻