絲絲講場：永隆鍾少權差啲Excellent
永隆助理總經理及零售銀行部主管鍾少權（Derek）上任近一年，為銀行創下唔少佳績，「Hard」同「Soft」兩方面都有提升。佢上年力谷私貸，另外又開拓信用卡收單業務，連聯歡晚宴都搞埋，佢自己評過去一年表現「靠近Excellent」，應該冇人有異議。
信用卡優惠吹「韓風」
永隆信用卡簽帳額第一季有雙位數增長，佢哋嘅信用卡繼早前主打泰國旅遊後，今次乘住韓風，推出「暢遊首爾」優惠，申請新卡就可以加1,700蚊換香港來回首爾嘅機票！永隆積極吸客，簽帳額要做到雙位數增長應該冇難度啦。
有行開去旺角銀行中心嘅朋友，不妨上一樓睇睇，Derek話，為咗配合「型格遊韓國」，喺銀行中心用LEGO砌咗個Coffee Shop。絲絲實地考察過，雖然暫時就未有咖啡飲住，不過個黑紅LEGO布景好Cute，相信唔使幾耐就可以成為少女們嘅影相聖地。
余絲韻