人稱輪后嘅法興證券環球股票產品部副總裁蔡秀虹（Eva），三年前同科技界老公結婚之後，又有喜事喇。今次絲絲就喺法興窩輪嘅記者會上見到腹大便便嘅佢，第一時間梗係行埋去恭喜佢啦，仲咁岩畀我打探到佢腹中塊肉係仔仔喎。
Eva同絲絲講，預產期係六月中，對於仔仔嘅出世佢話好開心，好期待同仔仔見面嗰一刻。絲絲就好好奇，Eva都結咗婚三年，點解會揀呢個時候陀仔呢，佢話其實都係隨緣o架咋，冇乜特別計劃過。
陀仔陀咗一排，Eva都話自己食多咗好多嘢，但好似食極都唔肥咁，睇嚟Eva養胎同炒輪都一樣咁有辦法，好嘢都去晒仔仔到。但好搞笑嘅係，Eva唯獨就肥咗喺啲手指上面，仲搞到戴唔落戒指添。
唔講唔知，原來Eva身邊有成十幾個朋友，都係差唔多時間做人爸爸媽媽，但個個嚟緊都係生女，得Eva一個生仔。絲絲就諗，睇嚟仔仔未出世就已經大把人爭住對親家啦！
法興近排就延長咗產假，等媽咪可以放足16星期，比之前多咗6個禮拜，Eva當然好開心啦。唔知Eva會唔會培訓仔仔做新一代輪王呢？
其實同場仲有法興董事李錦喺度，但大家一見到Eva就即刻衝埋去，完全忽視咗佢。搞到李錦都忍唔住向記者自嘲，話自己都有咗三個月。
余絲韻