尋日係愚人節，咁啱支付寶官方微博公布研發出一種神奇嘅支付產品「KungFu（空付）」，佢話用戶將來就算冇帶銀包同手機出街，都可以用已經通過掃描授權嘅戒指、面、手臂上嘅紋身，甚至以寵物嚟認證畀錢買嘢。
之不過，有網民對呢種「空付」技術半信半疑，就算支付寶喺微博放咗宣傳短片，實牙實齒話新產品六個月後面世，仲聲稱喺上海某個影城擺咗部空付體驗機畀大家現場感受一下。
網民除咗質疑新產品嘅安全性，仲有好多人留言詢問，如果用塊面嚟支付，咁「化妝前」同「化妝後」係咪會有影響，以後同人打鬥，又係咪要事先講明「唔好打面」呢？
雖然「空付」產品有幾真有待求證，但阿里旗下理財產品人氣爆燈呢點就絕對無花無假。
阿里娛樂數字平台「娛樂寶」嘅首期保險理財產品本周一正式開售，當日下午五點已經有超過十萬個網友通過娛樂寶成為「電影投資人」，首期推出嘅四個產品當中，又以郭敬明導演嘅《小時代》系列電影最受歡迎，勁賣超過七萬份。
余絲韻