今日係四月一號，絲絲尋晚臨瞓前，已經開始提醒自己：今日事事要精靈啲。仲未知點解？咁絲絲都幫你唔到。
○七年嘅今日，有人差啲中咗獨立股評人David Webb招，佢當日網上披露，一隻中資新股中鈈（02390）招股反應好，唔少城中富豪入股做策略投資者，又話該公司行政總裁名字叫April，姓Fu。噢，明哂。今年暫時未見到Webb玩惡搞，絲絲想問聲佢今年仲玩唔玩？可惜搵佢唔到。
畀人整蠱，頂多做一日愚人，笑吓就算；但若然係自己做出嚟嘅愚蠢商業決定，隨時畀人笑足一世。
要數史上最蠢商業決定，Western Union「唔接電話」呢單，肯定入圍。
話說喺一八七六年，電話係新發明，面對有人以10萬美元（即係今時今日大概200萬美元）兜售電話專利，當時電報巨頭公司Western Union拒「接」電話，仲直接覆電話發明者貝爾話，「呢件電子玩具都幾得意，不過無商業價值」；結果貝爾自己Keep番個專利，仲開咗間公司，間公司就係今日人人都識嘅AT&T。
講返近少少，話說一九六二年，有隊四人組合喺唱片公司Decca面前試音，唔夠一粒鐘唱足15首歌，Decca唔肯簽，理由係「結他組合就快Out」；隊Band之後簽咗EMI旗下Label，之後賣咗超過20億隻碟，呢隊Band叫Beatles。
又話說，喺三十七年前，柯達其實已發明咗首部數碼相機，但佢哋決定放埋一邊唔生產亦唔再發展，理由係驚會打擊番佢哋自己當時美國市佔90%嘅菲林市場；故事結局係，柯達二○一二年於美國申請破產。
余絲韻