絲絲講場：鄧聲興揸騰訊鬥持久
「股王」騰訊（00700）近排股價Chok爆，不過都冇影響到尚乘財富策劃證券業務部總經理鄧聲興（Kenny）呢位超級粉絲，佢揸住騰訊六年，勁賺百萬元，雖然依家同高位都差成百蚊，不過佢冇動搖過，一路持貨，仲教路賺要賺到盡，長揸先賺到大錢！
44蚊入 六年賺一球
騰訊股價坐火箭，Kenny就搭啱呢架順風車，喺○八年用每股44蚊買咗幾千股，六年間就賺咗百萬，聽落好似好易，之但係44蚊買，翻一番升至100蚊唔放，200蚊唔沽，再到十倍440蚊，你仲忍到唔放？有番咁上吓忍耐力，真係抵你賺！
絲絲向佢偷師，Kenny就話由買入一刻就係諗住長揸，因為騰訊喺內地互聯網獨大，用戶數目驚人，咁即係唔係符碌啦，不過佢都好坦白講，因為係幾千股，貨值都係十萬八萬，若果係幾十萬，應該一早放咗喎。
有壟斷優勢 無意沽
股王歷史高位係646元，依家冇咗百元，Kenny就話繼續長揸，冇諗過沽，除非內地通訊平台開放畀第二個，冇咗個壟斷優勢啦。不過佢又冇再入貨，佢話，除非股災令股價大跌啦，總之係非基本面因素，就會考慮再增加持股，但依家炒緊其他，唔得閒理佢！
佢話炒出炒入好難賺大錢，好多人都有個通病，就係賺少少就走，蝕就賴死，佢反而唔會咁，所以佢教路，跌得勁先要沽，學識止蝕，賺就要賺到盡，因為揀啱就好難再低位買到。Kenny個投資組合長揸佔比例六成，亦都會短炒啲細價股，如果用金額計騰訊係最賺錢，以股價升幅計就係細價股勁啲，不過佢都訴苦，長揸股份中都有內銀股。
余絲韻