Market Insight：恒大出招淡友有難

睇番50隻藍籌股，首季有11隻逆市錄得升幅，包括有重組及分拆概念的中信泰富（00267）及利豐（00494）；去年業績好而估值仍低的華潤電力（00836）；放寬民資合作比重上限的中石化（00386）；分拆業務上市的電能（00006），仲有股王騰訊（00700）及旺旺（00151）。

最意想不到，仲係退市陰霾下四隻本地地產及收租股，包括長實（00001）、信置（00083）、恒地（00012）以及太古A（00019），跌市中有0.1至7.5%進帳。第一季港股就畫咗個W，跌升跌升，第二季會穩步上揚，抑或係好似過去一季咁大玩回力球？

古勝冇點你2014/04/01

萬里長空

內銀股宜炒不宜揸

三月初市況急轉，唔少本地對沖基金埋數都發現得個做字，尤其科網及濠賭股升勢逆轉，連帳面富貴都無埋。反而連牛頭角順嫂都會識得underweight的內銀股，統統跑晒上嚟。如果short落隻建行（00939），睇見佢季結前居然連升七日，都咪話唔頭痕。

近日四大國有銀行業績，最後條大數清一色都比分析員預期好，就算股價彈咗成個星期，「中農工建」PE講緊4.9、5.3、5.1及5倍，連藍籌股平均市盈率一半都無。本來無乜可以挑剔，唯獨人人都知利率市場化，息差壓力今年會持續，反之不良貸款仲處於上升周期，芬佬對國有企業偏低的貸款壞帳，加上極大的風險溢價在內，古勝相信內銀係炒趨勢而唔係十分理想的長期投資對象。

大增派息好過睇戲

依家通街估總理李克強為要保住GDP有7.5%增長，第二季存款準備金率減的機會好大，buy on rumor sell on fact，或者中線內銀回勇之勢，可能捱到人行落實放水都未定。

恒大地產（03333）收市後公布業績，核心業務盈利按年升66.3%至103.1億元（人仔‧下同），毛利率按年拓闊1.6個百分點至29.5%，去年恒大如期打入內房企業的千億俱樂部，全年合約銷售升8.8%至1,004億元，一四年新訂目標1,100億元，意味有9.5%增長。

古勝都唔知掌舵人原來百足咁多爪，又搞球隊又發展礦泉水生意，同基金成日將恒大視為沽空對象有無關係，但恒大主席許家印同對沖基金經理唔多啱傾已經唔係新聞，過去增持及回購趕淡友的消息，相信有番咁上下歷練的缸邊客，無不耳熟能詳。

特別留意恒大成績表，因為早兩日已聽聞，恒大績前街外有做借貨生意的投行，老早畀大孖沙借到爆晒（昨日沽空唔大，得372萬股佔成交4.5%），昨業績亮點唔係賣幾多樓或目標幾多，是恒大主理人突然決定派大息，末期息0.43元，足足比前年0.14元多出兩倍，以昨收市價3.66港元，即2.89元人仔，股息率足足15厘！

今鋪真係唔挾爆街外淡友都幾難，就算好少參與呢類基金與大股東的鬥法，單係做花生友當睇戲，都夠晒過癮。

石藥需重上50日線

首季醫藥股乃熱炒板塊之一，雖然上月板塊表現似乎有所轉弱，但業績能夠交得出成績的優質股，股價亦具備一定的反彈動力。就如近日公布完業績的神威藥業（02877）及利君（02005），股價便雙雙做好，昨日收市分別升14%及8%，其中利君更創52周新高3.3元（港元‧下同），捧場客真係飲得杯落。

此外，早前公布完業績後股價引發調整的石藥集團（01093），昨日股價亦反彈5%，收報6.87元。且留意短線反彈若能確認50日線（6.98元）失而復得，有望完成調整並重納升軌；但若然未能收復50日線，則要提防調整未完，下一個較大的支持位在6元關。

古勝