Market Insight：達芙妮壞消息出盡

中央今年訂GDP增長達7.5%的目標，按第一季的出口及貸款增長數據來看，如果不作出財政政策協助，全年的目標實在有點過分進取。在堅持經濟重質不重量，或者走回頭路再以寬鬆貨幣政策刺激固定資產投資，達到高GDP增長目標的兩個可能性中，古勝相信後者機會較大。

事實上，中央將今年GDP增長目標訂得在7.5%，經已是畫公仔畫出腸，於第二季至第三季初，估計是最有機會降低處於歷史高位的存款準備金率的時機，一眾傳統經濟股份，亦可能在放水憧憬下繼做好。

古勝冇點你2014/03/31

萬里長空

近期有新股上市無耐就發盈警，亦有掛牌後首份業績畀投資者看到資產負債表內，無合理解釋下存貨突然以倍上升，最可惡是協助上市的投行及公司高管，根本是心知肚明，早在招股期間已知悉真相，卻依然隱惡揚善力sell畀客仔，總之一派貨物出門，貴客自理的態度。

新股表現夠驚嚇

以前唔鍾意投資新股，係明知投行精英如雲，太精於將公司盤數催谷得靚靚先至上市，發揮到最高集資效果，接貨者賺錢空間好有限。如今陷阱更係五花八門，港股愈來愈A股化，在下本身已好耐無重點投資新股，最多雞仔注入下飛。

若閣下唔信，睇番十月底至今上市的新股，累積跌掉四分之一以上的唔少，中國匯融（01290）、Mega Expo（01360）、雅高礦業（03313）、鴻偉亞洲（08191）、米格國際（01247）以及海昌控股（02255）。當中，居然錄得3,559倍超購的Magnum Ent（02080）都有份，仲有係古勝都認錯，乳業股中「獨弱」的原生態牧業（01431），上市至今股價累積跌逾五成，同期行家現代牧業（01117）跌幅都唔及佢一半，果然是新不如舊。

早前熱炒的板塊如手遊、科網及手機概念股等，上星期出現小股災，但威勝集團（03393）股價持續向上，周五更以一支大陽燭突破5.1元呢個強大阻力。表現如此強勁，當然同公司有份靚成績表有關，其截至去年十二月底止全年純利4.01億元（人民幣‧下同），按年增長24%。

威勝生意唔憂做

今年以國家電網為代表的各電網公司，將會保持智能電錶的應用規模，估計採購金額達到250億元，計劃新裝同埋更換智能電錶約6,000萬台。另國家電網今年資金計劃比起舊年多出30億元，主要增長為加大終端、集中器的投資。從多方面數據顯示，今年威勝的經營環境將繼續理想。

國家電網公司已公布今年智能電錶及數據採集終端第一次統一招標結果，其中威勝奪得約148萬台智能電錶合約，總值約3.26億，排名第一。與此同時，公司亦奪得約24.6萬台數據採集終端和集中器合約，價值約8,446萬元。

而截至上周為止，公司今年內已奪得國家電網公司集中招標累計價值約5.02億元合約，今年盈利增長有保證。

以上周五收市價計，威勝往績市盈率只係十倍左右，估值合理，以近日走勢來看，短期好有機會可以升穿一年高位5.5元（港元‧下同），並向6元關口進發。

《星星》迷或者收到風，達芙妮（00210）簽咗近排熱到爆燈的韓星全智賢出任品牌代言人，以《星星》劇中出現過的植入式廣告，產品全部大賣，呢個宣傳攻勢當然值得期待。不過睇番達芙妮股價，由舊年年初的11元樓上，到上星期一三年業績曝光，全年純利大跌65%至3.29億元，股價隊到3元都守唔住，最低見2.96元，創近四年半新低。

以達芙妮去年每股盈利0.2元，市盈率15.7倍，首季同店銷售跌至低雙位數，差過晒大行預測，但見大行報告都無再踩多腳，認為是壞消息出盡，公司也向分析員透露三月下旬情況已見好轉。

CB到期等贖回

去年中央反貪腐，唔單止高級消費品，中價零售所受的衝擊都唔細。以一間業績可能中短期見底，加埋星迷效應，目前達芙妮估值有一博之道。

不過，唔想損失機會成本的捧場客，可以再等多一陣，皆因公司○九年發的5.5億元的人仔可換股債券，今年六月十一日到期，行使價3.08元，以公司手上13.3億元現金，億多元短債，正所謂以小人之心度君子之腹，公司望基金換股的機會唔大，最理想係股價在3至3.5元之間徘徊，等成批債贖番至算。

古勝