香港國際七人欖球賽昨日揭幕，早前傳三日套票黑市價盛惠7,000元，炒高咗3.5倍，呢個深受鬼佬歡迎嘅賽事，多間外資大行都爭崩頭要波飛。
外電報道，摩根士丹利、法興同保誠就非常揼本，以逾40萬元高價買包廂位，令一眾高層同客戶舒舒服服睇波。
由於賽事緊接瑞信亞洲投資論壇，相信唔少與會嘅央行同企業代表都會乘機留港，贊助商之一滙豐銀行贊助及項目總監莫嘉樂（Giles Morgan）坦言，欖球賽係一個絕佳嘅藉口，畀全球商界領袖聚首一堂。
Cantor Fitzgerald駐港亞洲股票交易員Ben Hartwell已經第六年睇欖球賽，佢話金融市場近日無路捉，相信今屆欖球賽都一樣，但最重要係觀眾有個輕鬆周末。
事實上，啤酒同小食都係欖球賽必備元素，大會餐飲供應商已為在場人士準備過萬隻熱狗同逾兩萬個肉批。
雖然賽事一票難求，但大會今年喺中環新海濱整咗個HK Fan Zone，四個大電視全程直播，無得入大球場都可以睇得好過癮！
余絲韻