阿里巴巴美國上市嘅大計全球矚目，呢單集資額有望達150億美元嘅世紀IPO，吸引華爾街各大投行嘅爭奪。但未知係咪皇帝女唔憂嫁，阿里畀投行嘅條件原來都幾辣。有消息話，阿里畀投行嘅基本上市費用，或低至IPO金額嘅1%。呢個上市費只係比美國政府一○年將通用汽車重新上市時嘅0.75%略高，足以顯示阿里嘅「鍊價」能力拍得住美國政府。
投行對上市費用嘅計算，通常係同IPO公司嘅背景同集資規模掛鈎。就以在港進行嘅IPO為例，若集資規模達10億美元或以上，上市費通常係IPO金額嘅1.5至2.5%。至於美國嘅大型招股，上市費通常係IPO金額嘅3%到5.5%。一二年上市集資160億美元嘅Facebook（fb），當年低至1.1%上市費曾創下美國科網股IPO嘅新低，但阿里卻有可能只畀1%。
講番阿里，據說即使計埋投行因應情況可獲嘅獎勵花紅，公司上市費埋單亦只介乎1到2%，所以就算最後取代唔到fb成為上市費最低嘅科網IPO，阿里都幾乎肯定係美國歷來上市費最低嘅外國IPO上市個案。
數數手指，喺美國嘅IPO歷史上，目前上市費最低嘅係一○年重新掛牌、只要畀0.75%嘅通用汽車，呢單刁之所以咁平，係由於有關上市係美國政府因金融海嘯用公帑拯救通用汽車嘅退市安排，投行出於美國金融穩定嘅利益考慮，所以先肯以破底價接下單交易。
相對嚟講，瑞信、德銀、高盛、摩通、摩根士丹利同花旗六家投行，肯以「低價」為阿里服務，除咗考慮到阿里IPO嘅規模外，亦明顯係借今次機會，為自己省靚招牌。
余絲韻