Market Insight：國美績佳扭轉頹勢

上周美國聯儲局主席耶倫首次主持的議息，當個個以為佢張櫈都未坐暖唔會有大動作，息口維持不變？早預咗！放棄將失業率門檻作為加息的前瞻性指引？咁做都唔算意外，反而暗示可能在停止買債後六個月開始加息，對於一眾認為耶倫繼承了伯南克鴿派作風，咁鷹派的預告就真係估佢唔到。

加息衝擊新興市場

美國加息，有消費及就業復甦支持住，加息影響仲未算嚴重，尤其大多數聯儲局成員，預期一五年底指標息率只係由目前0至0.25厘，上番去1厘左右，仲係低於通脹。不過，對近期持續走資的新興市場，影響可能更大。

近期人民幣匯價急跌，唔少投行擔心一旦貶值潮持續，輕則大量多年來累積的人民幣升值套戥活動，會出現數以億計美元虧損；重則影響外商直接投資的興趣，以及近年相當依重發美元債取得融資的內房企業，會出現資金鏈斷裂及已發出債券出現巨額匯兌虧損等問題。

古勝冇點你

萬里長空

上周所見，提早加息的預期令本地息口敏感的高息股及地產股首當其衝，回顧領匯（00823）、中電（00002）、煤氣（00003）及長建（01038）等大部分股價，早於去年五月伯南克出席Jackson hole央行行長會議，暗示加息之後已輾轉調整，並已接近三季，到底值唔值得趁壞消息出盡入市？

喺年初，唔少分析認為今浪美債息可能要到3.5至4厘才見頂，相比領匯現價預期息率大約4.5厘，着數不足1厘，風險同回報唔成正比，但留意上周耶倫講話，十年期美債息在周四挾上2.79厘，周五已再回順，返回2.75厘收市。口裏說不，手底卻是最老實，既然債商行動顯示美債3厘差不多，有近1.5厘溢價的領匯，古勝個人認為股價已差不多見底，就算唔買，揸咗貨都唔應該依家先監平監賤沽出街。

富智康估值仲係貴

近排業績期，富智康（02038）及國美電器（00493）兩份成績表都唔錯，上周五卻反高潮，前者跌8.7%，收報4.26元，國美由即市升過12.5%，到收市升得4.1%報1.25元，基金趁好消息出貨的傾向明顯。

富智康過去五年業績梅花間竹，打從○九年開始，賺7,143萬元、蝕2.18億元、賺7,284萬元、蝕3.16億元，再倒賺7,771萬（美元‧下同）勝過市場預期，但一句到尾，往績實在有贏粒糖輸間廠味道。

當然，去年全球智能手機出貨量上升及高端產品比例改善，帶動這代工一哥，近十八個月毛利率的改善是有目共睹，一二年下半年、一三年上、下半年，毛利率由1.3%改善至4.1%及4.9%，大行估一四年蘋果公司新iPhone及其他高端智能手機帶動top line（營業額）經歷三年倒退今年會有10至15%回升，但計落預期市盈率20倍樓上，對比唔少台灣同業，或者零部件供應商連10倍都無，佢真係貴些少。

反而國美復甦故事頗動聽，去年業績比市場平均估計高出一成四，管理層將今年盈利派息比例目標由三成調高到四成（今年連特別息去到六成），對今年營運現金流始乎頗具信心，加埋今年電子商貿應該收支平衡甚至有一定收益，以及分析員會議上的四年計劃，由復甦轉為增長模式，都啱晒芬佬胃口，一四年14.4倍PE加埋未來兩年38%及22%增長，反高潮之後，無貨在手的反而可以睇番佢。

「救市」效應有保留

優先股試點被當成救市政策炒作，內銀同券商股上周五發力。理論上，隨着金融產品多樣化，帶動市場交投，券商股長線可受惠。至於內銀，短期而言發優先股有助緩解資金壓力，但卻無可避免進一步抽走市場資金，結果所謂的「救市」效應有多大，不得而知，而若內銀運用發行優先股集資所得在二手市場回購股份，確有助短暫穩定股價，但中長線股價升跌還是取決於盈利表現！

券商股中，中信証券（06030）股價由年初高位21.65元，反覆回落至本月低位13.72元，累跌幅度36%。在技術上呈極度超賣下，上周五回升可視為反彈浪，惟向上16元水平阻力甚大，本周四公司將公布末期業績，正所謂「寧買貴莫買錯」，未有貨在手又或者想溝貨，唔爭在睇埋份業績再作部署。

古勝