絲絲講場：高盛賓卡Haircut無人知
Banker查實最怕「Haircut」！喺金融字典入面，Haircut係削債意思，蝕本生意冇人想做。之不過，正常嘅Haircut都要o架，要見人嘛。喺高盛全球總部嘅側邊，就有間好出名嘅髮型屋，客仔都係高盛員工。佢哋有位好多人Like嘅髮型師Rudy Milian決定唔撈，佢話唔明點解班賓卡係都要同一個髮型，簡直埋沒咗佢嘅才華。
絲絲老友就解畫：原來好多賓卡喺返工時間蛇出去剪頭髮，佢哋唔要求靚，唯一要求係剪到好似冇剪咁，返去公司都唔會畀人發現，如果個個都差唔多髮型，更加神不知鬼不覺。
御用髮型師嫌無發揮
Rudy Milian由舊年年頭開始喺Salvatore專門幫高盛嘅銀行家剪頭髮，成間舖得三個髮型師。佢就用咗「灰暗年代」去形容幫高盛打工嗰一段日子，佢話嗰陣每日至少要幫廿個人剪頭髮，好多都係年輕銀行家，個個都剪一式一樣嘅頭髮，常規化到令人麻木，完全發揮唔到自己嘅才華。而且日日都早出晚歸，正確啲講應該係加班加到半夜先有得收工，仲要好多時連晏仔都冇時間食。
佢哋都幾分階級o架，好似高盛CEO布蘭克費恩，係由髮型屋老細Salvatore Anzalone親自操刀，其他人就幫啲中層或低級高盛員工剪頭髮。
但係Milian就唔想再做重複嘅嘢，佢想要有多啲創作空間，所以劈炮唔撈，走咗去紐約SOHO區嘅Harry's做。
余絲韻