港交所（00388）行政總裁李小加呢排唔多「老黎」，眼白白睇住阿里千億元大刁去咗美國，港股市值、成交無法更上一層樓，港交所股價更加係翻身無望。
不過，小加總裁「股場失意，球場得意」，事關早前港交所同7家金融機構踢足球友誼賽，港交所都未完成晒所有賽事，已超班跑出，贏咗冠軍。如果港交所喺市值、IPO集資額全球排名都超班跑出，相家會有更多人會高興！
講番球賽，8隊包括港交所、瑞銀、中人壽、西京、中銀保誠、RCM、法巴同一家經紀行。比賽係採雙循環賽制，即每隊要打足14場，所以有排打。不過，港交所喺早段已大發神勇，遙遙領先，港交所打到第12場，已領先超過六分，所以已肯定攞硬冠軍。
小加總裁一向都係足球發燒友，雖然佢唔係場場都有落場，但間中都有落場玩吓。不過，小加就謙稱自己老喇，落場梗係要留番畀啲後生，佢都係知道港交所捧硬盃後，先夠膽落場！
絲絲就問小加，港交所有冇同證監會打吓友誼波咁，小加講笑咁話，同證監會打波就要「鬆章」喇，不過，有口痕友就話，港交所「鬆章」還「鬆章」，證監會都係會「公事公辦」，拒絕港交所畀阿里來港上市！
余絲韻