本周聯儲局議息，係耶倫第一次以主席身份主持會議，卻忽然變咗一件無關痛癢的小事，除非耶倫轉軚先有好戲睇。
耶倫由主角變配角，因為呢幾日焦點就係人民幣擴大浮動範圍至2%，另克里米亞公投對烏克蘭、俄羅斯或西方之間的角力仲繼續發酵緊，有傳周四歐盟就決定點樣制裁俄羅斯，避險情緒又再升溫。
至於商品貨幣近日反彈緊，其中新西蘭央行上周加息，最重要係暗示嚟緊會進一步加息至一七年，宣布開始加息周期，策略上逢低買入係最安全做法。
不過，都要留意幾樣嘢，如未來環球經濟真係放緩，可能令新西蘭改口風都唔定。其次要留意澳元兌紐元交叉盤，1.0440係○五年低位，亦係近20年低位，如澳元太弱紐元太強，對新西蘭出口不利，所以紐元要升，都要求神拜佛澳元短期內唔好跌，預期紐元本周繼續喺0.8450至0.8600高位整固機會較大。
GMO CLICK環球通副總裁 陳健豪