絲絲講場：興業開分行星光熠熠
興業銀行尋日喺香港開海外第一間分行，絲絲有幸獲邀出席佢哋嘅開幕禮，感受吓財金界猛人空群到賀嘅盛況。
數數手指，香港自○九年國家開發銀行請到咁有卡士嘅嘉賓陣容後，已經五年冇咁墟冚嘅銀行分行開幕禮喇！
立足香港 放眼海外
今次興業銀行請嚟嘅主禮嘉賓，包攬政經界猛料人士，好似財經界方面，就有人保集團副總裁周立群、恒生銀行（00011）副董事長兼行政總裁李慧敏等人出席。
主人家就總動員喇，董事長高建平同埋幾十位職員到齊香港，加上大批獲邀嘉賓，開幕場地企到滿，星光熠熠。
興業銀行香港分行行長胡麟話，興業落戶香港係將本港視作通向海外發展嘅平台，希望興業香港可以為本港經濟作出貢獻，不過會唔會喺香港上市就要由總行董事會決定。
余絲韻