絲絲講場：鍾少權玩盡鐵人之旅
嚟緊復活節去邊好？絲絲請教咗永隆銀行助理總經理及零售銀行部主管鍾少權（Derek），佢話農曆新年去咗台灣，完成佢環島單車行嘅心願，叫絲絲參考吓佢的路線，睇見佢瘦咗唔少，睇嚟體力要求好高喎，都係參考吓其他選擇先。
單車環島日踩十粒鐘
Derek話路程好辛苦，但都好滿足，仲話特登食多咗肉類，但係絲絲見佢，都係比之前瘦咗唔少。Derek喺台灣平均每日踩車超過十個鐘，八日半就完成台灣環島單車行，佢話一個環島遊就歷盡四季，由氣溫得返幾度凍到震騰騰，到熱辣辣時超過三十度，仲要風吹雨打，連件雨褸都爛埋，佢仲話過程專心踩車，沿路好少得閒睇風景，只係中間要休息時先可以享受吓。
返到香港即跑馬拉松
其實Derek話佢都唔係第一次去台灣踩單車，雖然上次唔係環島遊「踩到瘦」，吸取教訓後今次旅程特別食多啲肉，點知佢返到香港就去咗跑馬拉松，結果朋友見到佢都係話佢瘦咗唔少，Derek話近排都係要休息吓，二月都少咗練跑。
踩完車返嚟Derek就忙到不亦樂乎，話說佢過檔永隆之後一直話要將分行變成多功能中心，搞咗十幾場地區分行講座之後，農曆新年喺總行大堂舉辦音樂會，三月頭仲喺總行搞埋大型投資講座，真係盡用舖位空間。
余絲韻