「債王」都要自我反省！太平洋投資管理（Pimco）行政總裁埃利安閃辭呢件事，仲有好多手尾，聞說件事同創辦人兼首席投資官格羅斯嘅脾氣都好有關係。
終於，格羅斯話自己反省咗一個禮拜，承認以前同埃利安執掌Pimco嗰陣，開親會不時全場靜晒嘅現象並唔健康，反映出冇人夠膽得罪佢哋是但一個，所以應承以後會畀下屬多啲提出異議嘅自由。
「債王」肯認低威，全因擔任Pimco信託人廿三年嘅波普喬伊喺財經頻道CNBC，批評格羅斯要控制吓自己，咪成日當住大班高層落其他人面。就算天才多數有性格，「唔等如Pimco淨係得你（格羅斯）一個」囉。
投資世界唔講感情，Pimco舊年見紅，再加埋同埃利安鬧翻，畀部分機構投資者列入觀察名單，格羅斯被炮轟表現「平庸」，唔值2億美元（約15.6億港元）年薪。
波普喬伊話，格羅斯表現縱使未差到要炒魷嘅地步，不過認真「平庸」，攞佢嗰2億美金年薪請2,000個教師好過。佢仲話，芬克執掌全球最大資理管理公司貝萊德，年薪都係得2,000萬美元，即係格羅斯嘅一成，所以格羅斯都應該只係值咁多。
余絲韻