阿里巴巴買起文化中國傳播（01060），魚缸股民大炒特炒，阿里主席馬雲一於隔岸觀火，走咗去意法遊，仲喺自己嘅「來往」扎堆，風騷貼文貼相，仲貼咗好多emoji，驚死你唔知佢幾咁心情愉快，唔知一手蟹貨嘅股民，係咪睇到眼火爆呢？
馬雲自爆，用七日時間去咗美國、法國和意大利三個國家共六個城市，佢嘅文章話，小時候最希望早上喺紐約食早餐，中午去巴黎，再飛到布宜諾斯艾利斯食晚餐，但實情係非常勞累。
佢話喺法國同意大利見咗好多政府官員同企業家，包括年僅39歲嘅意大利新任總理倫齊，同埋幾位法國部長，仲話一講到淘寶網賣法、意產品，大家都好興奮，佢相信網購會影響愈來愈多國家經濟和年輕人嘅生活方式。
公務以外，馬雲都有時間去距離巴黎兩個半小時車程嘅諾曼第，即係二戰時英美聯軍登陸之地，話好難想像當年嘅戰爭場面。佢喺巴黎時有感而發，話據說歷代法國打仗時，只要巴黎聽到城外敵軍槍炮聲，就會為咗保護城市文化而放低武器，唔知係真唔係？但就肯定同中國嗰份「寧為玉碎，不為瓦全」嘅想法相反。
雖然佢嘅扎堆似遊記，但口痕友話，唔知係咪曲線話畀大家知，阿里會更加國際化，好似舊年底，佢同英國首相卡梅倫見面，啲相Post晒出嚟，仲話佢哋好可能會去英國上市呢！
余絲韻