美國非農數據比市場預期為好，令市場相信美國經濟繼續復甦，聯儲局亦不會放慢收水步伐，嘗試炒聯儲局減慢退市的聲音大減 ，數據理論上利好美元。
睇番隻歐元，一舉升破一條由金融海嘯前歷史高位1.6030開始向下延伸的長期下降軌，執筆時匯價仍在高位，短線歐元佔盡上風。不過，睇番其他外幣，都未見有跟進買盤做新高，一旦歐元破位上升，到時美金就出現一個下跌浪。
睇基本因素，歐元區經濟只是有復甦訊號，而歐元過強似乎進一步壓抑歐元區過低的通脹，暫時都仲係說服唔到自己歐元有條件升破呢條咁重要的下降趨勢線。
今個星期數據唔多，比較重要係星期四的二月份零售銷售，如果就業市場好轉，理論上零售銷售都同樣會改善，有利美元反彈，但喺星期四前歐元睇嚟有機會繼續試高位，可能要掂一掂1.40先肯罷休，要跌穿1.3720才確認轉勢。
GMO CLICK環球通副總裁 陳健豪