舊年突然發威嘅比特幣（Bitcoin）近排倒瀉籮蟹，Mt.Gox喺日本申請破產，尋日喺美國都申請埋破產，點知網上流傳，背後原因根本唔係Bitcoin畀人偷，激到網民飛起，就連以準確預測美國次按危機一炮而紅嘅「末日博士」魯比尼都要連發五個tweet，怒插Bitcoin係「龐氏騙局」！
Mt.Gox行政總裁卡珀利斯嘅網誌同社交網站Reddit戶口星期日開始畀人洗板，黑客宣稱攻入咗Mt.Gox伺服器，攞到一份716MB咁大、記載超過一百萬次交易嘅Excel文件，發現Mt.Gox其實仲有超過95萬個Bitcoin，換言之早前話唔見咗85萬個Bitcoin係講大話，激到有人爆粗大鬧卡珀利斯。
Reddit幾個鐘後以「張貼被竊資料實屬不當」為由，將投資者雪花咁飛嚟嘅留言剷晒。
不過Bitcoin圈子似乎認定卡珀利斯「穿櫃桶底」，加上佢繼續展現「潛水」本色。有網民聲稱畀Mt.Gox倒閉害到雞毛鴨血，要拍賣獨家得來嘅Mt.Gox數據庫去補償，20GB包送所有用戶個人資料，盛惠100個Bitcoin，差唔多成50萬港紙！
事到如今，莫講話絲絲暈陀陀，魯比尼都無眼睇。佢尋日喺Twitter狂踩Bitcoin涉及刑事勾當，本身亦唔係會計單位同支付工具，做唔到保值，價格鬼死咁波動，又隨時畀人Hack，根本做唔到貨幣，只係一個「龐氏騙局」！
余絲韻