國壽集團改朝換代嘅傳聞愈演愈烈，有傳國壽（02628）總裁萬峰將會退下火線，由同齡嘅副總裁林岱仁接棒，之後仲會有中高層換血潮，集團將積極下放中層管理層去山東省、河南省鍛煉，實行將管理團隊年輕化。
保險公司兩、三年就有人事調動，今次音樂椅遊戲嘅主角好可能係萬峰，佢任內呢三年都算積極改革！傳聞話佢會出任國壽集團嘅副總裁，而佢原本嘅職務，就會由林岱仁接替。
雖然絲絲暫時未搵到國壽發言人問個明白，之但係連日有內地媒體報道，空穴來風呀！唔知國壽會唔會喺月尾嘅業績記者會上，交代一下係真定假呢？
其實今次調職計劃只係一個開始，換血潮陸續有來，啱啱被委任做國壽電商總裁嘅劉英齊都有份玩音樂椅遊戲，有傳佢會調任去國壽產險出任總裁一職，而執掌電商嘅新總裁，將會係一位從國壽資產管理擢升嘅新生代。
為咗化解行業面對青黃不接嘅危機，有指集團將會派遣三大核心部門負責人，去山東、河南、浙江接受鍛煉，希望可以培養多啲後備人才！
余絲韻