香港人習慣夜瞓，唔係要上網就係為咗煲韓劇。金銀業貿易場理事長張德熙原來都係夜鬼一名，晚晚都成四點先上床，瞓四、五粒鐘又話起身返工，究竟咁忙搞邊科？
理事長今年都六十一歲，年紀唔細，點解搞到成四點咁「早」瞓？佢笑笑口話，自己做咗金業多年，由於國際金市係廿四小時運作，所以佢早就習慣咗凌晨先瞓，希望睇實金價走勢。喺深夜時分，佢除咗睇住金市外，仲會刨四、五份報紙，兼睇埋電視報最新嘅國際金融訊息。當然，間中亦會約吓朋友聯誼，所以凌晨時分嘅生活都相當充實！
一向鍾意講笑吹水嘅張德熙仲話，佢夜晚兩點都會WhatsApp畀貿易場嘅同事，叫佢哋預備第二日嘅工作，絲絲平時都做好多粒鐘，但對比佢又真係差咗啲，唔怪得佢話絲絲份工好清閒啦！
理事長除咗金銀業貿易場嘅公職外，總共仲有成廿個公職，本身亦係張氏金業董事總經理，又係另外幾間公司嘅主席，自然忙到不得了，唔係三、四點先瞓，邊度可以負擔起咁多使命！
余絲韻