Market Insight：負面消息困擾市場

恒指啱啱穿咗250日線，基金經理仲有序地減磅，樂觀睇，經過一月中新興市場走資潮後，大孖沙要沽都沽得七七八八，昨日指數跌近400點，反而見成交縮減，主板由上周五695億元回落至680億元，後市可能會陰陰乾，而未必出現急跌。

不過，如果睇埋行業表現，悲觀睇法係基金始終死抱住環保能源、科網等新經濟板塊，懶理其他舊經濟股死活。市場兩極化，剩番貴到極的概念股，同平極都無人吼的傳統經濟股，對大部分唔願意損失機會成本的玩家，風險無疑更大。

A股後市舉步維艱

滬綜指跌穿2,000點心理關口，收報1,999點跌58點，橫睇豎睇，市場清一色負面消息。先係人行見死不救上海超日太陽能，開了違約先例，令人擔心民企違約仲會陸續有嚟；馬航失蹤原因未明；兩會會期剩番兩日，供市場幻想空間相對細咗，A股玩家齊齊落雨收柴；IPO重啟真空期快將結束，抽走市場游資；仲有係人民幣匯價反彈幾日之後，過去兩個交易日又再跌過，昨最低見6.1460。

古勝冇點你

萬里長空

然而，但凡種種都仲唔及二月出口按年急跌18.1%咁震撼，同市場預期升10.6%南轅北轍。雖則農曆新年在一月尾二月初，以一、二月合計，首兩個月中國出口跌1.6%，無18.1%跌幅咁驚嚇，但對比去年第四季7.4%增長，踏入一四年，中國出口數據經已肯定開壞個頭，全年點樣保住7.5%GDP增長呢？如丈八金剛教人摸不着頭腦！人行會放水？睇昨日收市公布的二月新增貸款6,445億人仔，又低過市場預期，眾多不利因素加起來，A股（甚至本地的國企股）短期想有運行都幾難。

「雙馬」概念股鬥出位

不過，股市唔會直升或者直跌，跌到一定程度總會有所反彈。二月內地CPI升幅回到2%，創十三個月新低，本來畀到人行更大空間手鬆一點，不過國際農產品價格近期掉頭向上，分析師估三、四月食品價格回升又會令CPI回溫，睇情況人行要透過減存款準備金鬆番啲錢出街，最快都要等第二季中，睇落三月到四月初個市都幾鬼難捱。

昨日個市無乜焦點，「雙馬」概念股就特別顯示出佢地高強的吸金力。中信21世紀（00241）升近1%收報7.37元。老實講，古勝對佢確實提唔起一點點投機興趣，只想直接跳去故事結局，睇一班股市魔術師，將來用乜方法填補市值與公司資產值之間，近十倍的差距。用超筍價塞一堆生意入去，抑或股價受地心吸力主宰，在科網熱結束後跌番落嚟？

另一隻華南城（01668）昨升8.7%收報4.73元，差些少就挑戰被馬化騰寵幸佢之後的4.99元高位，缸邊客好似早有共識，認為佢會好似上星期的中信21世紀一樣，破位衝多一浸。

中資電訊股多包袱

近年內地科網業發展迅速，科網股積極四出併購加速壯大王國，完善產業鏈，股價更迭創新高，板塊炒作氣氛熱鬧，大戶同散戶都樂在其中！

反觀昔日擁「皇者之風」的三大中資電訊股──中移（00941）、聯通（00762）及中國電信（00728）卻備受冷落。中移昨日股價更創出52周新低71元，捧場客真係心傷！

事實上，科網企業在國策支持新興產業發展下，業務發展一日千里，資本開支包袱亦沒有要承擔4G巨額投資的中資電訊股般沉重，加上流動通訊業務競爭日趨激烈，拓展增值服務及相關配套業務的速度及靈活性亦遠遠不及科網企業。

在此消彼長之下，盈利前景失色，投資者「移情別戀」亦可以理解的。是故，想入市撈底中資電訊股之看官們，宜認清形勢，別對號入座。

古勝